Канстытуцыя – галоўны закон краіны

11.03.2016

15 сакавіка - Дзень Канстытуцыі Рэспублікі Беларусь. У інфармацыйна-сэрвісным цэнтры цэнтральнай бібліятэкі арганізавана выстаўка дзяржаўнага свята «Канстытуцыя – галоўны закон краіны», на якой прадстаўлены тэксты ўсіх пяці Канстытуцый Беларусі, кнігі, матэрыялы з перыядычных выданняў аб канстытуцыйным развіцці нашай краіны.
Канстытуцыя—абавязковы элемент сучаснай дзяржавы, аснова дэмакратыі, народаўладдзя. Значэнне Канстытуцыі такое вялікае, што сам факт яе прыняцця ацэньваецца як крок да дэмакратыі. Пятая па ліку Канстытуцыя Рэспублікі Беларусь, прынятая 15 сакавіка 1994 г. — гэта найважнейшы палітыка-прававы дакумент. Яна з'яўляецца асновай, ядром прававой сістэмы, рэгулюе самыя стабільныя і важныя грамадскія адносіны. Беларуская Канстытуцыя заклікана гарантаваць кожнаму грамадзяніну свабоды і правы, неабходныя для працы, прыстойнага жыцця і гарманічнага ўсебаковага развіцця асобы.