Ад Скарыны – да сучаснасці...
Пастыка, А. Ад Скарыны ― да сучаснасці ... / Алена Пастыка // Заря. - 2017. — 3 августа. — С. 4.
Да 500-годдзя беларускага кнігадрукавання ў публічных бібліятэках Кобрынскага раёна дэманструюцца кніжныя выставы.
Ад Скарыны – да сучаснасці...
Жнівень 1517 года… Чэшская Прага… З друкарскага станка ў сярэдневяковым памяшканні на адной з маляўнічых вулачак выходзіць першая кніга Францыска Скарыны «Псалтыр». Пачынаецца эпоха беларускага кнігадрукавання.
Жнівень 2017 года… Беларускае грамадства шырока адзначае 500-гадовы юбілей Скарынавай кнігі. Значны ўклад у правядзенне розных мерапрыемстваў уносяць і публічныя бібліятэкі Брэсцкай вобласці. Яскрава і красамоўна распавесці пра тытана беларускай культуры Ф. Скарыну, яго эпоху, а таксама пра яго ролю ў развіцці беларускага і ўсходнеславянскага кнігадрукавання, станаўленне беларускай мовы і літаратуры павінны бібліятэчныя кніжныя выставы і экспазіцыі.
На працягу жніўня ўсе прыхільнікі беларускай культуры змогуць наведаць цікавыя і пазнавальныя, традыцыйныя і арыгінальныя бібліятэчныя мерапрыемствы. Так, брастаўчане і госці абласнога цэнтра з 6 жніўня і на працягу наступнага тыдня маюць магчымасць прыняць удзел у гістарычным подыуме «Першая гістарычная кніга: погляд праз прызму часу» і ў гістарычных ракурсах «З гісторыі беларускага кнігадрукавання», «Пачатак выдавецкай дзейнасці», якія адбудуцца ў Брэсцкай цэнтральнай гарадской бібліятэцы імя А.С. Пушкіна. А напрыканцы бягучага месяца сумесна з валанцёрамі Праваслаўнага маладзёжнага брацтва ў гонар свяціцеля Мікалая пры Свята-Мікалаеўскім брацкім храме супрацоўнікі спецыялізаванай бібліятэкі-філіяла № 12 правядуць урок духоўнасці «Кніга сусветнай славы» для чытачоў з абмежаванымі магчымасцямі зроку.
Да 500-годдзя з пачатку выдавецкай дзейнасці Ф. Скарыны ў Баранавіцкай цэнтральнай гарадской бібліятэцы імя В. Таўлая шэраг мерапрыемстваў пачаўся пад назвай «Загадкавыя кніжныя знакі Францыска Скарыны». У бібліятэках гарадоў Бяроза і Белаазёрск будуць экспанавацца кніжныя выставы «Духоўная кніга – крыніца вялікай мудрасці», «Спадчына Францыска Скарыны: погляд праз стагоддзі», «Пад знакам Францыска Скарыны», «Ясны месяц Скарынавай кнігі». Бібліятэка аграгарадка Агарэвічы, што ў Ганцавіцкім раёне, 17 жніўня і 1 верасня запросіць усіх жадаючых на экскурсію «Кніга і час» у пакой рэдкай кнігі, а ў раённай дзіцячай бібліятэцы ў апошні месяц лета і ў верасні будзе экспанавацца кніжная выстава «Жыццё і мудрасць на паперы». Раённая ж бібліятэка імя В. Праскурава праз арыгінальную карціну на адным са сваіх вокнаў запрашае чытачоў наведаць экспазіцыю «Францыск Скарына – асветнік і першадрукар», якая пачне дзейнічаць 1 верасня.
У сельскіх бібліятэках Драгічыншчыны ў гонар Ф. Скарыны ў жніўні адбудуцца наступныя святочныя мерапрыемствы: «Скарынаву кнігу ў вечнасць пусціць», «Беларускія асветнікі», «Жить не по лжи. А по великой мудрости» і інш. Супрацоўнікі Жабінкаўскай цэнтральнай раённай бібліятэкі сумесна з дзяржаўнай установай адукацыі «Жабінкаўскі раённы цэнтр творчасці для дзяцей і моладзі» падрыхтавалі разгорнутую выставу-панараму «Часоў былых і новых повязь», якая, пачынаючы з 16 чэрвеня і да канца года, працуе ў фае бібліятэкі. Адметнасцю экспазіцыі стаў трыпціх «Вобразы Залатога веку», створаныя ўдзельнікамі аб’яднанняў «Аўтарская лялька» і «Кераміка» (К. Шахалевіч, Л. Пашко, Н. Платонава і А. Валасюк).
Да 500-годдзя беларускага кнігадрукавання ў публічных бібліятэках Кобрынскага раёна будуць дэманстравацца кніжныя выставы «500. З кнігай Скарыны», «Благаславёныя Скарынай», «З глыбінь вякоў нам засталася кніга», «Слава Францыска не ведае межаў» і інш. Жыхароў і гасцей г. Лунінца супрацоўнікі раённай бібліятэкі запросяць 6 жніўня на выставу-алею «Час чытаць!» і паэтычны подыўм «Любімаму гораду – нашы таленты». Кніжныя выставы «Часоў былых і новых повязь», «Дыялог стагоддзяў» падрыхтаваныя бібліятэкарамі Лукаўскай, Хаціслаўскай і Арэхаўскай сельскіх бібліятэк Маларыцкай бібліятэчнай сістэмы, пазнаёмяць наведвальнікаў з гісторыяй беларускага кнігадрукавання ад Скарыны да нашых часоў.
На пачатку верасня традыцыйна да Дня беларускага пісьменства і друку бібліятэкі Брэстчыны штогод праводзяць шмат цікавых і разнастайных мерапрыемстваў. Запрашаем вас, шаноўныя жыхары вобласці, наведаць літаратурныя святы і вечары паэзіі, гістарычныя падарожжы, прэзентацыі новых кніг, літаратурныя і музычныя кампазіцыі і іншыя мерапрыемствы. З анонсамі цікавых сустрэч можна пазнаёміцца на сайтах цэнтральных бібліятэк.
Алена ПАСТЫКА,
вядучы бібліятэкар аддзела бібліятэказнаўства
УК «Абласная бібліятэка імя М. Горкага»
