Курачук, С. Гісторык, картограф, літаратар : юбілейная выстава-партрэт / Святлана Курачук // Кобрынскі веснік. – 2023. – 29 ліпеня. - С. 16 (№ 52). – С. 16 : фат.
З 1 па 31 ліпеня ў краязнаўчым інфармацыйным цэнтры Кобрынскай цэнтральнай раённай бібліятэкі праходзіць юбілейная выстава-партрэт «Гісторык, картограф, літаратар», прысвечаная 85-годдзю з дня нараджэння Л. Р. Казлова.
Гісторык, картограф, літаратар
З 1 па 31 ліпеня ў краязнаўчым інфармацыйным цэнтры Кобрынскай цэнтральнай раённай бібліятэкі праходзіць юбілейная выстава-партрэт «Гісторык, картограф, літаратар», прысвечаная 85-годдзю вучонага-гісторыка, даследчыка ў галіне гістарычнай геаграфіі і картаграфіі Беларусі, пісьменніка, выдаўца Льва Раманавіча Казлова.
Наш вядомы зямляк Леў Казлоў, ураджэнец в. Літвінкі Кобрынскага раёна, выпускнік сярэдняй школы № 2 г. Кобрына, яшчэ ў школьныя гады любіў чытаць, выяўляў здольнасці да малявання. А захапленне гісторыяй, подзвігамі легендарных першаадкрывальнікаў, дзякуючы якім з'яўляліся карты, заняло вядучае месца ў яго творчым жыцці. Леў Рамановіч – спецыяліст у галіне картаграфіі. Ён узнаўляе рарытэтныя старадаўнія карты, адшукваючы іх у розных архівах, бібліятэках, на аўкцыёнах і ў прыватных калекцыянераў. Дзякуючы дзейнасці Льва Раманавіча айчынныя музейныя экспазіцыі папоўніліся дзясяткамі новых выяў беларускіх зямель з маршрутамі старажытных часоў, якія раней не дэманстраваліся. У картаграфічным кабінеце Музея гісторыі Мінска большасць экспанатаў выкананы рукамі Льва Казлова. Навуковец перакананы, што карты могуць расказаць нават больш, чым летапісы, гістарычныя дакументы і мемуары. Нездарма калегі называюць Льва Казлова «беларускім Меркатарам», параўноўваючы яго з вядомым фламандскім картографам і географам XVI стагоддзя.
Многія гады Леў Рамановіч выкладаў у Беларускім дзяржаўным універсітэце, Беларускім педагагічным універсітэце імя М. Танка, Беларускім дзяржаўным універсітэце культуры і мастацтваў; працаваў у Інстытуце гісторыі НАН Беларусі, дзе арганізаваў працу па складанні новых гістарычных карт і школьных атласаў. Ён галоўны рэдактар «Вялікага гістарычнага атласа Беларусі», часопісаў «Падарожнік» (1997-2001), «Наш край». Навуковы кансультант выдавецтва «Беларуская энцыклапедыя імя П. Броўкі», член Саюза прадпрымальнікаў Беларусі, Нацыянальнай Геаграфічнай Асацыяцыі (ЗША), міжнароднага «Клуба лідэраў гандлю». Праца яго выдавецтва «Арты-Фэкс» адзначана залатой узнагародай Europe Award (Парыж, 2001). Ён аўтар кніг і шматлікіх артыкулаў краязнаўчай і картаграфічнай тэматыцы, удзельнік шэрагу міжнародных і рэгіянальных навуковых канферэнцый.
Выстава «Гісторык, картограф, літаратар» знаёміць з асноўнымі работамі Льва Казлова, сярод якіх навукова-папулярны альбом «Старажытная картаграфія Беларусі», выданне «Стагоддзі на картах», «Беларусь у працах польскіх картографаў (XVI-XX стст.)», навукова-папулярны ілюстраваны «Гістарычны атлас Беларусі», «Картаграфія Беларусі падчас паўстання Тадэвуша Касцюшкі», «Картаграфія Беларусі падчас паўстання 1863-1864 гг.» і іншыя, якія раскрываюць талент нашага земляка як картографа. У нейкай ступені данінай павагі і любві да роднага краю, абавязкам перад землякамі Леў Рамановіч лічыць працу над кнігай «Памяць: гісторыка-дакументальная хроніка Кобрынскага раёна», гісторыка-эканамічным нарысам да 700-годдзя Кобрына «Кобрын», у выданні якіх ён прымаў непасрэдны ўдзел. Зацікавяць наведвальнікаў экспазіцыі і літаратурныя выданні Льва Казлова. Гэта кніга гістарычных анекдотаў «З дазволу караля і вялікага князя», гістарычная трылогія «Радзівіл “Сіротка”» (кн. 1), а таксама выдадзены пад псеўданімам Плат. Гудовіч зборнік вершаў «Размова нанова».
Трэба адзначыць, што аснову выставы складаюць матэрыялы, перададзеныя ў дар бібліятэцы Львом Раманавічам. Пяць гадоў таму ў кобрынскай бібліятэцы адбылася творчая сустрэча з земляком у рамках прэзентацыі экспазіцыі «Вандроўкі па ваколіцах мінулага». Многія матэрыялы, прадстаўленыя на ёй, былі падараваны аўтарам бібліятэцы і яе чытачам. У краязнаўчым фондзе бібліятэкі таксама шмат кніг з паметкай «З асабістай бібліятэкі Л. Р. Казлова».
Выстава, прымеркаваная да 85-годдзя з дня нараджэння нашага паважанага земляка Льва Раманавіча Казлова, уключае работы аўтара, а таксама публікацыі аб жыцці і дзейнасці вучонага, у тым ліку інфармацыйна-бібліяграфічныя выданні бібліятэкі аб юбіляры. Экспазіцыя дапоўнена фатаграфіямі, картамі. Прадстаўлена больш за 40 дакументаў.
28 ліпеня ён адзначыў 85-ы год нараджэння. Землякі жадаюць Льву Раманавічу захаваць на доўгія гады моцнае здароўе, аптымізм, энергію, працаздольнасць. І чакаюць новых сустрэч!
Святлана Курачук,
бібліёграф аддзела абслугоўвання і інфрмацыі
Кобрынскай цэнтральнай раённай бібліятэкі.